एमडीएचचे आजोबा ठरले सर्वात श्रीमंत सीईओ

धरमपाल गुलाटी हे महाशयजी या नावानेही ओळखले जातात. ते वयाच्या ९४व्या वर्षीही नेमाने, न चुकता दररोज कारखान्यात जातात आणि डीलर्सनाही भेटतात. एमडीएच कंपनीच्या समभागांपैकी ८० टक्के समभाग त्यांच्याकडे असून गेल्या आर्थिक वर्षात कंपनीने २१३ कोटींचा नफा कमावला ज्यापैकी २१ कोटी रुपये सीईओ गुलाटी यांच्या खात्यात जमा झाले. गुलाटी यांचे वडील चुन्नीलाल यांनी १९१९ साली पाकिस्तानातील सियालकोटमध्ये एक छोटस दुकान सुरू केले. मात्र त्याच दुकानाचे रुपांतर एवढ्या मोठ्या कंपनीत होईल, असा विचार त्यांनी स्वप्नातही केला नव्हता. मात्र ६ दशके अथक मेहनत करून धरमपाल गुलाटी यांनी ही कंपनी आज या पदावर पोहोचवली आणि मसाल्यांच्या जगात एक नव स्थान मिळवले.