नवी दिल्ली : सध्या प्रचंड प्रमाणात सोशल मीडियाचा वापर वाढला असून पर्यटन स्थळी किंवा सहलीला गेल्यानंतर अनेकजण तेथील फोटो फेसबुकवर पोस्ट करतात. शेअर करतात मात्र आता असे फोटो पोस्ट करणे महागात पडू शकते. कारण आयकर विभाग फेसबुकवरील अशा फोटोंवर करडी नजर ठेवून आहे. एवढेच नाही, तर परदेशी सहलींचा फोटो असेल तर लागलीच संबंधित करदात्याची चौकशी केली जात आहे.
आता फेसबुकवरील फोटोंवर आयकर विभागाची नजर
त्यामुळे आता फेसबुकवर फोटो अपलोड करताना काळजी घ्यावी लागणार आहे. आजकाल फेसबुक आणि त्यावर टाकल्या जाणा-या पोस्ट अनेकांसाठी जीव की प्राण झाल्या आहेत. एखादा घरगुती कार्यक्रम असो, सेल्फी असो की एखादी सहल असो, फेसबुकवर पोस्ट करण्यासाठी काही मंडळींना कारणच पुरेसे असते. काहींना तर काहीही कारण नसले तरी चालते. मात्र आता असे फोटोज फेसबुकवर टाकताना काळजी घ्या. कारण आता तुमच्या फेसबूक अकाउंटवर इन्कम टॅक्स अधिका-यांची नजर असू शकते. टाईम्स ऑफ इंडियाने दिलेल्या माहितीनुसार वाढत्या मंदीमुळे किंवा अन्य कारणांमुळे करदाते कर भरताना आपले उत्पन्न लपवतात किंवा कमी दाखवतात. पण हेच करदाते आपल्या सहलींचे व पार्टीचे फोटोज फेसबुकवर टाकतात आणि शेअर करतात. मात्र या शेअरिंगमुळे इन्कम टॅक्स करदात्यांचे खरे उत्पन्न अधिका-यांच्या नजरेस पडते. याच परदेशी सहलींच्या फोटोंचा करसंदर्भात चौकशीमध्ये इन्कम टॅक्सकडून वापर होत आहे.
दरम्यान, मुंबई, दिल्ली यांसारख्या महानगरात राहणारे करदाते ह्याला बळी पडत नाहीत. मात्र निमशहरी भागातील करदात्यांच्या या हालचालींवर इन्कम टॅक्स अधिका-यांकडून बारीक लक्ष ठेवले जाते. असेच पश्चिम बंगालमधील असनसोल येथे एका चार्टड अकाउंटटला त्याच्या परदेशीय सहलीवरून हा अनुभव आला. लोकांच्या खाजगी गोष्टींमध्ये मध्यस्ती करू नये पण फेसबूक पोस्टवरून याच करदात्यांचे खरे उत्पन्न उघडकीस आले. करदात्याच्या फेसबुक पोस्टवर फोटो दिसले म्हणून त्यावरून थेट कुठलाही निष्कर्ष काढला जात नाही किंवा त्रास देण्यासाठी त्याचा वापर होत नाही. मात्र या फेसबुक पोस्टवरून करदात्याची जवीनशैली आणि खरे उत्पन्न जाणून घेणे हे दोन हेतू आहेत.