भारताच्या अॅव्हीएशन बाजारात पकड मजबूत करण्यासाठी युरोपमधील सर्वात मोठी एअरक्राफट कंपनी एअरबस सज्ज झाली आहे. केंद्र सरकारच्या कुशल भारत योजनेअंतर्गत कंपनीने भारतात प्रशिक्षण केंद्र सुरू करण्याचा निर्णय घेतला असून त्यासाठी ४ कोटी डॉलर्स म्हणजे २६६ कोटी रूपयांची गुंतवणूक केली जाणार आहे.
कंपनीचे भारतातील अध्यक्ष श्रीनवासन द्वारकानाथ या संदर्भात माहिती देताना म्हणाले, हे प्रशिक्षण केंद्र २०१७ मध्ये सुरू होईल व २०१८ नंतरच्या दहा वर्षात येथे ८ हजार पायलट व २ हजार मेंटेनन्स इंजिनिअर्सना प्रशिक्षित केले जाईल. हे केंद्र दिल्ली एनसीआर येथे सुरू केले जात आहे. एव्हीएशनमध्ये येत्या दोन वर्षात भारतीय बाजारात दुप्पट वाढ अपेक्षित आहे व त्यासाठी मोठ्या प्रमाणावर पायलटस व मेटेनन्स इंजिनिअर लागणार आहेत. हे प्रशिक्षण केंद्र एअरबस स्वतःच चालविणार आहे व त्यासाठी एकावेळी ४ ए३२० विमाने मावतील असे डिझाईन केले जात आहे.