वॉशिंग्टन – नुकत्याच करण्यात आलेल्या एका अभ्यासातून ई-सिगारेटच्या जाहिरातीही घातक असल्याचे स्पष्ट झाले आहे. जाहिरातीच्या माध्यमातून लोकांना धूम्रपानाला हा पर्याय उपलब्ध असल्याचे समजत असल्याने त्यांना पर्याय मिळतो. परिणामी, धूम्रपान बंद न करता व्यसनी लोक ई-सिगारेट्सकडे वळत आहेत.
८०० पेक्षा जास्त नियमित धूम्रपान करणार्‍या लोकांचा पेनसेल्वेनिया विद्यापीठाच्या जनसंवाद विभागातील संशोधक एरिन के. मलोनी आणि जोसेफ कॅपेला यांनी अभ्यास केला. त्याशिवाय, धूम्रपान सोडल्यानंतर ई-सिगारेटचा पर्याय उपलब्ध झाल्याने त्यांनी पुन्हा धूम्रपान सुरू केल्याचेही या अभ्यासात स्पष्ट झाले आहे. ई-सिगारेट्‌सच्या सुमारे डझनभर जाहिराती एरिन आणि जोसेफ यांनी एकत्र आणल्या. संशोधनासाठी त्यांनी नियमित किंवा क्वचित धूम्रपान करणार्‍यांसह हे व्यसन सोडलेल्यांचाही अभ्यास केला. या लोकांना ई-सिगारेटच्या जाहिराती वारंवार दाखविण्यात आल्या. जाहिराती पाहिल्यानंतर, त्यांना धूम्रपान करण्याची तीव्र इच्छा झाल्याचा निष्कर्ष काढण्यात आला. ‘हेल्थ कम्युनिकेशन’ नावाच्या आरोग्यविषयक नियतकालिकात हे संशोधन प्रसिद्ध करण्यात आले आहे.