मुंबई : मुंबई उच्च न्यायालयाने विवाहपूर्व ठेवलेले शारीरिक संबंध म्हणजे बलात्कार ठरू शकत नसल्याचे म्हटले असून सध्या विवाहपूर्व शरीरसंबंध ठेवण्याचे प्रमाण भारतातील मोठ्या शहरांमध्ये वाढत आहे, लग्नाचे आश्वासन देऊन ठेवलेले शरीरसंबंध म्हणजे बलात्कार ठरत नाही, असे मत मुंबई उच्च न्यायालयाने मांडले आहे.
आश्वासन देऊन ठेवलेले शरीरसंबंध म्हणजे बलात्कार नाही – उच्च न्यायालय
मुंबई उच्च न्यायालयात नाशिकमधील वकिल पेशा असलेल्या जोडप्याचे प्रकरण आले असून यातील तरुणीने तिच्या प्रियकरावर लग्नाचे आमीष दाखवून बलात्कार केल्याचा आरोप केला होता. या तरुणाने मुंबई उच्च न्यायालयात अटकपूर्व जामीनासाठी अर्ज केला होता.
‘१९९९ पासून आमचे प्रेमसंबंध होते. आम्हा दोघांचा धर्म वेगळा असल्याने तिच्याशी लग्न करता आले नाही. मात्र दोघांमध्येही संमतीने शरीरसंबंध निर्माण झाले होते’ असा युक्तीवाद संबंधीत तरुणाने न्यायालयासमोर केला होता. दोन्ही बाजूचा युक्तीवाद ऐकल्यावर उच्च न्यायालयाने विवाहपूर्व शरीरसंबंध आणि बलात्काराच्या घटना याविषयी मत मांडले आहे.
विवाहपूर्व शरीरसंबंध ठेवण्याचा एखाद्या तरुणीचा निर्णय हा तिच्या संमतीने होता की नाही हे परिस्थितीजन्य पुराव्याच्या आधारे ठरु शकते असे सांगत न्यायालयाने उदाहरणही दिले आहे. पहिले लग्न लपवून ग्रामीण भागातील अशिक्षित तरुणीला लग्नाचे आमीष दाखवून तिच्यासोबत शरीरसंबंध ठेवणे हा बलात्कार ठरु शकतो असे उच्च न्यायालयाने स्पष्ट केले. संबंधीत प्रकरणातील तरुणी ही उच्चशिक्षीत असून शरीरसंबंधांसाठी तिचीही संमती असल्याचे प्रथमदर्शनी दिसत असल्याचे स्पष्ट करत न्यायालयाने संबंधीत तरुणाला जामीन मंजूर केला.