आता अस्तित्वासाठी ‘राज’गर्जना !

लोकसभेत मिळालेल्या पराभवाला पाठीशी घालत मनसे अध्यक्ष राज ठाकरे विधानसभेच्या तयारी लागले आहेत. त्यांच्या अनेक भाषणात त्यांनी आपल्या ब्ल्यू प्रिंटची चर्चा केली होती. आता या विधानसभेला ते आपली ती ब्लू प्रिंट घेऊन जनतेसमोर येण्याची शक्यता वर्तविली जात आहे.त्यासाठी स्वत:ला मुख्यमंत्रीपदाचे उमेदवार म्हणून घोषित करण्य़ाचीही शक्यता आहे.

मोंदींनी ज्या प्रकारे निवडणुकांमध्ये विकासाचा मुद्दा समोर करत यश मिळवले . त्याप्रकारे राज ठाकरे हे देखील विकासाचा मुद्दा घेऊन विधानसभा निवडणूक लढवतील,असेही बोलले जात आहे;पण पक्षाचा पराभव का झाला ?यापेक्षा मागील निवडणुकांची मतांची टक्केवारी पाहता त्यात यंदा निम्म्याने जबरदस्त घट झाली आहे. लोकसभा निवडणुकीचे विधानसभा मतदारसंघ निहाय मतदान हे विधानसभा निवडणुकीला जमेचे ठरते मात्र यंदा गतवेळ पेक्षा त्यात घसरण झाली आहे. त्यामुळे मनसेच्या गोटात चिंतेचे वातावरण आहे, शिवसेना सरस ठरली आहे. मोदींना पाठींबा देवूनही शपथविधीला आमंत्रण कसे काय नाही ? या पार्श्वभूमीवर राज ठाकरे काय बोलतात ?याकडेही पक्षाचे काय राजकीय वर्तुळाचे लक्ष आहे. सद्यस्थितीत मनसेकडून ‘या मला आपल्याशी बोलायचे’ अशी विनवणी करणारे जाहिरात फलक सर्वत्र लागले आहेत ,शिवाय सोशल मिडीयावरही त्याद्वारे ‘साकडे’ घातले जात आहे. आता उद्या राज ठाकरे सोमय्या ग्राऊंडवर जाहीर सभेत काय बोलणार ?यावर पक्षाची आगामी वाट’चाल’ अवलंबून राहणार आहे.