रॉयल चॅलेंजर्स बेंगळूर संघाचा या हंगामातील कर्णधार विराट कोहलीचे बॉलिवूड अभिनेत्री अनुष्का शर्माशी डेटिंग सुरु असल्याची बाब सर्वश्रुत आहे. अर्थात, बुधवारी आयपीएल गाला डिनरदरम्यान दस्तुरखुद्द विराट कोहलीनेच त्याची जाहीर कबुली दिल्याने अनेकांच्या भुवया उंचावल्याशिवाय राहिल्या नाहीत.बॉलिवूड अभिनेता शाहरुख खानने आपल्या कल्पकतेची प्रचीती देत बनावट स्वयंवर सोहळय़ात विराटला त्याच्या लेडी लव्हची ओळख करुन देण्यास सांगितले. विराटला त्याने काही पर्यायही दिले होते. अर्थातच, विराटने अनुष्काच्या नावाला पसंती दिली!

विराटने अनुष्काची पसंती जाहीर करताच तिची छबी विराटकडे सोपवण्यात आली आणि लागलीच, तिथेच फोटोसेशनही पार पडले. अलीकडेच आयसीसी टी-20 विश्वचषक स्पर्धा संपन्न झाल्यानंतर विराट कोहली अनुष्काची भेट घेण्यासाठी थेट जोधपूरमध्ये दाखल झाल्याची चर्चा होती. एनएच 10 चित्रपटाच्या चित्रीकरणासाठी अनुष्का त्यावेळी जोधपूरमध्ये होती.

कोहलीने मागे एकदा अनुष्काची भेट घेण्यासाठी थेट लंकेतही `धाव’ घेतल्याची चर्चा होती. अनुष्का त्यावेळी अनुराग कश्यपच्या बॉम्बे वेल्वेट चित्रपटाच्या चित्रीकरणात व्यस्त होती.अनुष्का व विराट ही जोडी भारतीय संघ न्यूझीलंड दौऱयावर असताना ऑकलंडमध्ये हातात हात घालून फिरत असल्याचे एक छायाचित्रही बरेच चर्चेत राहिले होते. सातव्या आवृत्तीच्या आयपीएल स्पर्धेत कोहली यंदा बेंगळूर रॉयल चॅलेंजर्स संघाचे नेतृत्व साकारणार असून बुधवारी गाला डिनरदरम्यान त्यानेही काही नृत्याविष्काराचे दाखले दिले.