प्यांगयांग- उत्तर कोरियातील पुरूषवर्गासाठी आगळेच फर्मान सरकारने जाहीर केले आहे. त्याप्रमाणे सरकारने घालून दिलेल्या नवीन मार्गदर्शक तत्वांनुसार उत्तर कोरियातील पुरूषांना देशाचा नेता किम जोंग उन याच्याप्रमाणेच केस कापून घ्यावे लागणार आहेत. कांही आठवड्यापूर्वी हा नियम फक्त राजधानी प्यांगयांग मधील पुरूषांसाठीच लागू होता मात्र हळूहळू तो देशभर लागू केला जात आहे. यामुळे संपूर्ण देशात आता किम जोंग प्रमाणेच हेअरस्टाईल असलेले पुरूष पाहायला मिळतील.
या संबंधीचे सरकारी फर्मान जारी झाले असले तरी सर्व पुरूषवर्गाने त्याची गंभीर दखल घेतलेली नाही. अर्थात नेत्याला नाराज करणे शक्यच नाही. त्यामुळे आमच्या नेत्याची हेअरस्टाईल मस्तच आहे पण सगळ्यांनाच ती शोभणार नाही कारण प्रत्येकाचा चेहरा व डोक्याचा आकार वेगळा असतो असा युक्तीवाद करण्याचा प्रयत्न चालविला आहे. खासगीत मात्र पुरूषवर्ग या फर्मानाबद्दल नाराजी व्यक्त करत आहेत असेही समजते.