सुरबाया – इंडोनेशियामध्ये माऊंट केलुड या जागृत ज्वालामुखी कुंडामधून सतत राख बाहेर पडत असल्यामुळे येथील तीन आंतरराष्ट्रीय विमानतळ उड्डाणासाठी बंद ठेवण्याचा निर्णय घेण्यात आला आहे. या ज्वालामुखी कुंडामधून राख बाहेर पडत असल्याचे सूत्रांनी सांगितले. या कुंडामधील स्फोटाचे आवाज देशातील दुसरे सर्वांत मोठे शहर असलेल्या सुराबायापर्यंत ऐकु आले. माऊंट केलुडपासून हे अंतर तब्बल 130 किमी इतके आहे.

या स्फोटानंतर आकाशात उडालेल्या राखेमुळे सोलो, जोग्यकर्ता व सुरबाया या तीनही शहरांमधील आंतरराष्ट्रीय विमानतळ बंद करण्यात आले. या ज्वालामुखी स्फोटामुळे कोणतीही जीवितहानी झालेली नाही. या ज्वालामुखी कुंडाच्या सभोवतालच्या दहा किमी अंतरामधील 36 गावांमधील सुमारे दोन लाख लोकांना हे ठिकाण सोडण्याचे निर्देश देण्यात आले आहेत. केलुड हा इंडोनेशियामधील सुमारे 130 जागृत ज्वालामुखींपैकी आहे.