न्यूयॉर्क – भारताच्या राजनैतिक अधिकारी देवयानी खोब्रागडे यांना अमेरिकेत कायदेशीर कारवाईपासून कोणतेही राजनैतिक संरक्षण मिळणार नाही. त्यांच्या विरोधात व्हिसा फसवणूकी प्रकरणी खटला सुरुच राहिल असे मॅनहॅटनच्या सरकारी वकिलाने न्यायालयात स्पष्ट केले. अमेरिकेत घरकामासाठी आणलेल्या महिलेला नियमांपेक्षा कमी वेतन आणि व्हिसा फसवणूकी प्रकरणी देवयानी खोब्रागडेना १२ डिसेंबरला अमेरिकेत अटक झाली होती. त्यानंतर तुरुंगात त्यांची अपमानास्पद पध्दतीने अंगझडती घेण्यात आल्याचे समोर आल्यानंतर भारत आणि अमेरिका दोन्ही देशातील संबंध ताणले गेले होते.
खोब्रागडे या अमेरिकेसाठी माजी राजनैतिक अधिकारी असून, त्यांना कायदेशीर कारवाईपासून संरक्षण मिळू शकत नाही असे मॅनहॅटनचे सरकारी वकिल प्रीत भरारा यांनी न्यायालयात सादर केलेल्या कागदपत्रांमध्ये म्हटले आहे. राजनैतिक संरक्षण सरकारी अधिकृत कामांमध्ये मिळू शकते असे अमेरिकेचे म्हणणे आहे. देवयानी खोब्रागडे अमेरिकेत राजनैतिक अधिकारी होत्या. त्यांना अमेरिकेकडून पूर्ण राजनैतिक संरक्षण होते त्यामुळे त्यांच्यावरील खटला रद्द करावा अशी मागणी देवयानींच्या वकिलाने न्यायालयाकडे केली आहे. त्यावर अमेरिकन सरकारने आपली बाजू मांडताना खटला मागे घेता येणार नसल्याचे स्पष्ट केले आहे.
