ओस्लो – जागतिक स्तरावर रासायनिक शस्त्रास्त्र निर्मूलनासाठी काम करणा-या ओपीसीडब्ल्यू या रासायनिक शस्त्रास्त्र प्रतिबंधक संघटनेला यंदाचा 2013 सालचा शांततेसाठीचा नोबेल पुरस्कार जाहीर झाला आहे. शुक्रवारी दुपारी पत्रकारपरिषदेत नोबले समितीने शांततेच्या नोबेल पुरस्कारासाठी ओपीसीडब्ल्यूचे नाव जाहीर केले. या पुरस्कारासाठी पाकिस्तानच्या मलाला युसूफझाई आणि रशियाचे राष्ट्राध्यक्ष व्लादिमीर पुतीन यांची नावे चर्चेत होती.
ओपीसीडब्ल्यूची स्थापना 1997 साली झाली. नेदरलँण्ड हॅग्यू येथे या संघटनेचे मुख्यालय आहे. ओपीसीडब्ल्यूच्या देखरेखीखाली सिरीयातील रासायनिक शस्त्रास्त्रे नष्ट करण्याचा कार्यक्रम सुरु आहे. 10 डिसेंबर रोजी ओस्लो येथे होणा-या कार्यक्रमात हा पुरस्काराचे दिला जाणार आहे. स्वीडीश उद्योगपती अलफ्रेड नोबेल यांच्या स्मृतीप्रित्यर्थ हा पुरस्कार दिला जातो. 1895 मध्ये या पुरस्काराची सुरुवात झाली. गेल्यावर्षी युरोपियन युनियनला हा पुरस्कार मिळाला होता.
