रावळपिंडी – पाकिस्तानच्या माजी पंतप्रधान बेनझीर भुट्टो यांची हत्या माजी अध्यक्ष परवेझ मुशर्रफ यांनी घडवून आणल्याचे आरोप ठेवण्यात आल्याचे वकिलाने सांगितले आहे. बेनझीर भुट्टो यांची 2007 मध्ये आत्मघातकी हल्ला करून हत्या करण्यात आली होती. त्यांच्या हत्येप्रकरणी मुशर्रफ यांना दोन वेळा समन्स धाडण्यात आले होते, असेही सांगण्यात आले आहे.
मुशर्रफ यांच्यावर हत्या, हत्येचा कट रचणे आणि हत्येसाठी मदत करणे असे आरोप ठेवण्यात आले आहेत, सरकारी वकील चौधरी अझर यांनी वृत्तसंस्थेकडे सागिंतले. दहशतवाद विरोधी कोर्टात सुरू असलेल्या सुनावणीच्या वेळी हे आरोप दाखल करण्यात आले आहे. मुशर्रफ यांनी हे आरोप फेटाळून लावल्याचे अझर यांनी सांगितले. या खटल्याची सुनावणी 27 ऑगस्ट रोजी होणार आहे.दरम्यान, इस्लामी दहशतवादी संघटना आणि मुशर्रफ यांची राजवट यांच्या संयुक्त कटातून भुट्टो यांची हत्या घडवून आणण्यात आली, असा आरोप बेनझीर भुट्टो यांचा मुलगा बिलावल भुट्टो यांनी या आधी केला होता.
