सांगली- सांगली जिल्ह्यातील बत्तीस शिराळा हे गाव जिवंत नागांच्या पुजेसाठी जगप्रसिद्ध आहे. बत्तीस शिराळा येथील नागपंचमीला शेकडो वर्षाची परंपरा आहे. त्यामुळे या गावात नागपंचमीचा उत्सव पाहण्यासाठी हजारो भाविक दाखल झाले आहेत. नागपंचमी दिवशी या गावात चक्क जिवंत नागांची पूजा करण्यात येते.
प्राणीमित्र आणि सर्प प्रेमींच्या विरोधामुळे येथील उत्सवावर २००२ सालापासून कोर्टाने काही प्रमाणावर मर्यादा आणल्या आहेत. त्यामुळे सापांची मिरवणूक आणि उंच नागांच्या स्पर्धा न भरवता आता फक्त पारंपरिक पद्धतीने घरोघरी नागपूजा केली जाते. नागपंचमीच्या आधी आठवडाभर नाग पकडून आणले जातात. नाग डे-यामध्ये ठेवले जातात. दररोज सकाळ – संध्याकाळ या नागांना बाहेर काढून त्यांची देखभाल केली जाते.
नागपंचमीच्या दिवशी सकाळी घरात नागाची पूजा केली जाते. गावातील अंबामाता देवीला नैवद्य दाखवून नागांना दर्शनासाठी मंदिरा समोर आणले जाते. मानकरी `महाजन` यांच्या वाड्यातून पालखी काढली जाते. आणि त्यानंतर नागांना पुन्हा आणलेल्या ठिकाणी सोडले जाते. नागपंचमीचा हा आगळावेगळा सोहळा पहाण्यासाठी दरवर्षी भाविक याठिकाणी मोठया प्रमाणात गर्दी करतात.
