इस्लामाबाद, दि. 13 – गेल्या काही दिवसापासून ग्रहमान फिरलेले पाकीस्तानचे माजी अध्यक्ष परवेझ मुशर्रफ यांना आज 2006 मध्ये बलूचिस्तान नेते अकबर बुगती यांच्या मृत्युप्रकरणी अधिकृतरित्या अटक करण्यात आली. त्यामुळे, पाकीस्तानात परतून पुन्हा अध्यक्ष होण्याची स्वप्ने पाहणार्या मुशर्रफ यांना इस्लामाबादेतील सबजेलमध्ये रुपांतर करण्यात आलेल्या आपल्या फार्महाऊसवरच राहावे लागणार आहे. त्यांना 15 दिवसांची न्यायालयिन कोठडी सुनावण्यात आली आहे.
बलूचिस्तानमधील दहशतवादविरोधी न्यायालयाने मुशर्रफ यांचा जामीन नामंजूर करत त्यांच्या अटकेचे आदेश दिले होते. त्यांनतर, बलूचिस्तान पोलीसांचे एक पथक या आदेशाचे पालन करण्यासाठी क्वेटाहून इस्लामाबादला रवाना झाले होते. बुगती यांच्या हत्येप्रकरणी चौकशी करण्यासाठी मुशर्रफ यांच्या कोठडीची मागणी या पोलीस पथकाने इस्लामाबादेतील दहशतवादविरोधी न्यायालयात केली होती. ती मान्य करत न्यायालयाने मुशर्रफ यांची 14 दिवसांच्या न्यायालयिन कोठडीत रवानगी केली. 2006 मध्ये मुशर्रफ पाकीस्तानचे अध्यक्ष आणि लष्करप्रमुख असताना त्यांच्या आदेवावरुन झालेल्या लष्करी कारवाईत बुगती यांचा मृत्यु झाला होता.
