केस कापा; पण आमच्याच मर्जीने!

बीजिंग – दुष्काळ, अन्नटंचाई यांसारख्या भीषण संकटांनी घेरलेल्या उत्तर कोरियातील कम्युनिस्ट राजवट, लष्करी बळाच्या आधारावर जनतेला नियंत्रणात ठेवण्याच्या प्रयत्नात आहे. आतापर्यंत भूकबळी आणि मानवी मांस खाणाऱ्याची संख्या दाबून ठेवणाऱ्या कोरियन सरकारने आता नागरिकांच्या हेअरस्टाइलवरही निर्बंध आणले आहेत. भांडवलशाहीचे भ्रष्ट परिणाम रोखण्याच्या नावाखाली हेअरस्टाइलचे काही प्रकार निश्चित करण्यात आले असून, नागरिकांनी याच प्रकारची हेअरस्टाइल करण्याचे आदेश आहेत.

उत्तर कोरियाचे सर्वोच्च नेते किम जोंग उन यांच्या पुढाकारानेच हा निर्णय घेण्यात आला आहे. या  हेअरस्टाइलपैकीच महिलांसाठी काही प्रकार असून, दहा प्रकार पुरुषांसाठी आहेत. या हेअरस्टाइल नागरिकांसाठी अत्यंत ’कम्फर्टेबल’ असल्याचा दावाही त्यांनी केला आहे. डोक्यातून केसांच्या रूपातून जीवनसत्त्वे बाहेर जात असल्याचे सांगत ही बंधने घातल्याचे सांगण्यात आले आहे. किम यांना पूर्वीची हेअरस्टाइल आवडत नसल्यामुळे, स्वतःची स्टाइल बदलताना त्यांनी हा निर्णय घेतल्याची चर्चा आहे.

केसांचे स्पाइक स्वैराचारी असल्याचे सांगत या हेअरस्टाइलला पूर्ण बंदी घालण्यात आली आहे. तरुणांना पाच सेंटिमीटरपर्यंतच केस वाढविण्याची मुभा आहे; त्यांना पंधरा दिवसांतून केस कापावेच लागणार आहेत. वृद्धांच्या मेंदूच्या वाढीचा वेग कमी असल्यामुळे, त्यांना सात सेंटीमीटरपर्यंत सवलत आहे. विवाहित महिलांना केस छोटे ठेवण्याच्या सूचना असून, अविवाहित महिलांना केस वाढविण्याची, कुरळे करण्याची परवानगी आहे.