केजरीवालांचे नवे लक्ष्य अमरसिंग

त्रिपाठी यांनी कानपूर पोलिसांत २००९ साली ही फिर्याद दाखल केली होती आणि तिच्यात अमरसिंग यांनी १०० बनावट कंपन्या स्थापन केलेल्या असल्याचे म्हटले होते. या कंपन्या प्रत्यक्षात अस्तित्वात नाहीत पण त्यांच्या नावावर प्रचंड पैसा जमा दाखवला आहे. या कंपन्यांचे संचालक म्हणून अनेक लोकांची नावे टाकली आहेत. पण आता त्यातल्या सर्वांनीच हात वर केले असून आपला या कंपन्यांशी काहीही संबंध नसल्याचे म्हटले आहे. या कंपन्या स्थापन झाल्याचे तर या कागदोपत्री संचालकांना माहीत नाहीच पण या कंपन्या बरखास्त झाल्या असल्याचेही माहीत नाही. प्रत्यक्षात एक एक करून या शंभर कंपन्या बंद करून पंकजा आर्टस आणि मेसर्स सर्वोत्तम अशा दोनच कंपन्या शिल्लक ठेवल्या आहेत. या सगळ्या कंपन्यांचे पैसे या दोन कंपन्यात जमा केले आहेत. ते ५०० कोटी रुपये आहेत. एवढे पैसे त्या १०० कंपन्यांत कोठून आले याचाही काही पत्ता लागत नाही आणि ते नंतर याच दोन कंपन्यांत जमा का केले याचेही स्पष्टीकरण होत नाही.

गंमतीचा भाग म्हणजे या प्रकरणाची फिर्याद कानपूर पोलिसांत दाखल झाली होती ती आता मागे घेण्यात आली आहे. हा सारा एकमेकांना सांभाळून घेण्याचा प्रकार आहे. मुलायमसिंग यांच्यावर केंद्राने खटले भरलेले आहेत. ते मागे घेण्यात येणार आहेत कारण मुलायमसिंग हे सलमान खुर्शीद यांच्यावरचे खटले मागे घेणार आहेत.याच देवघेवीत मुलायमसिंग यांनी सरकारला  अमरसिंग यांच्यावरची कारवाई थांबवण्याची विनंती केली आहे.  

आर्थिक गुन्हे विभागाने या प्रकरणाची तपासणी केली आहे आणि अमरसिंग हे दोषी आढळले आहेत पण आता देवघेवीत या खात्याने कारवाई न करण्याचे ठरवले आहे. या खात्याने अमरसिंग यांची फाईल कानपूर पोलिसांकडे अधिक तपासासाठी पाठवली आहे आणि पोलिसांनी केवळ तीन दिवसांतच या प्रकरणात काही पुरावे नाहीत असे म्हणून फाईल बंद केली आह. तशी सूचना उत्तर प्रदेश सरकारने त्यांना केली आहे. पुरावे असतानाही फाईल बंद का केली असा सवाल आता केजरीवाल विचारतील.