नवी दिल्ली,३१ ऑक्टोबर-’काँग्रेसला लोकसभा निवडणुकीत कसलेही नुकसान होऊ नये म्हणून १९९१ साली राजीव गांधी यांच्या हत्येचा खरा व्हीडिओ दडवून ठेवण्यात आला,’ असा आरोप या हत्या प्रकरणातील मुख्य चौकशी अधिकारी के. रागोथामन यांनी केला आहे. एम. के. नारायणन हे राजीव गांधीच्या खूपच जवळचे होते. पण त्यांच्या हत्येची वस्तुस्थिती मांडून काँग्रेसला हानी पोहोचविण्याची हिंमत आपल्याकडे नव्हती, असेही त्यांनी म्हटले आहे.
’कॉन्स्पिरसी टू कील राजीव गांधी ः फ्रॉम सीबीआय फाइल्स ’ या आपल्या पुस्तकात रागोथामन यांनी राजीव गांधी हत्याकांडातील दडवलेल्या गोष्टींवर प्रकाश टाकला आहे. ’ १९९१ साली राजीव गांधी ज्या ठिकाणी सभा घेणार होते, त्या ठिकाणी तब्बल अडीच तास आधीच एलटीटीईचे मारेकरी शस्त्रे घेऊन सज्ज होते. मानवी बॉम्ब बनलेली धनू हीसुद्धा त्यांच्याबरोबर होती. हत्येच्या दुसर्‍या दिवशी या सार्‍याचा पुरावा असलेला व्हीडिओ गुप्तचर विभागाच्या ( आयबी ) हाती लागला होता.
हा व्हीडिओ उघड झाला असता तर काँग्रेस सरकारच्या बेफिकरीचे आणि कायदा व सुव्यवस्थेचे धिंडवडे निघाले असते. या सार्‍याचा फटका काँग्रेसला निवडणुकीत बसला असता. त्यामुळेच आयबीचे तत्कालीन प्रमुख एम. के. नारायणन यांनी हा व्हीडिओ दडपला ’, असे रागोथामन यांनी म्हटले आहे.
’तामिळनाडू पोलिसांना आयबीने वेगळाच व्हीडिओ दिला होता. तो व्हीडिओ दूरदर्शनवर दाखवल्या जाणार्‍या व्हीडिओंसारखा गुळमुळीत होता. त्यातून सत्य बाहेर आलेच नाही. मानवी बॉम्ब बनलेली धनू ही राजीव गांधी सभास्थळी आल्यानंतर तिथे आल्याचे त्यात दाखविण्यात आले होते. ते चुकीचे आहे,’ असा दावाही रागोथामन यांनी केला आहे.
