नवी दिल्ली,१५ ऑक्टोबर-विमानात प्रवास करताना आपण उच्च दर्जाच्या उत्पादनाच्या खरेदीचा आनंद घेतो, रेल्वेच्या प्रवासात खरेदीचा आनंद घेता येत नव्हता. पण आता हा आनंदही प्रवाशांना देण्याचा निर्णय रेल्वे मंत्रालयाने घेतला आहे. त्याचाच एक भाग म्हणून रेल्वेने लांब पल्ल्याच्या शताब्दी गाड्यांमध्ये लक्झरी प्रकारातील उत्पादनांच्या विक्रीचा निर्णय घेतला आहे.
रेल्वेच्या लांब पल्ल्यांच्या शताब्दी गाड्यांमध्ये परफ्युम , स्किनकेअर , हॅन्ड बॅग , वॉचेस, ज्वेलरी तसेच काही गिफ्ट आर्टिकल्स उपलब्ध असतील. शताब्दी गाड्यांच्या एक्झिक्युटिव्ह आणि चेअर कार वर्गातील ग्राहकांना या सेवेचा लाभ घेता येणार आहे.
ग्राहकांना लक्झरी वस्तुंसोबतच चॉकलेटचाही आस्वाद घेता येणार आहे. प्रायोगिक तत्त्वावर एक महिन्यासाठी नवी दिल्ली ते भोपाळ या शताब्दी एक्सप्रेसमध्ये ही सेवा लवकरच सुरू केली जाणार आहे. यासाठी एका एजन्सीची नियुत्त*ीही करण्यात आली आहे. प्रायोगिक तत्त्वावर सुरू झालेल्या या सेवेला ग्राहकांचा चांगला प्रतिसाद मिळाला तर दुसर्या शताब्दी गाड्यांमध्ये ही सेवा सुरू केली जाईल, असे रेल्वेच्या एक वरिष्ठ अधिकार्याने स्पष्ट केले.
एका गाडीमध्ये संबंधित हॉकरला दोन ट*ाॅली वापरण्याची मुभा राहील. त्यासाठी २ लाख रुपये डिपॉझिट ठेवावे लागतील आणि विक्रीच्या १२ टक्के रक्कम रेल्वेला द्यावी लागणार आहे. सुरूवातीला मिळणार्या प्रतिसादानंतर योजनेचा दीर्घकालीन विचार होणार आहे.
ग्राहकांना अधिक उच्च दर्जाच्या सेवा देण्याच्या दृष्टीने रेल्वे विविध पर्यायांचा विचार करीत आहे. त्याअंतर्गत प्रवाशांना मनोरंजनासाठी चित्रपट तसेच टीव्हीवरील मालिका सॅटेलाईट सेवेच्या माध्यमातून पाहता येतील , असा प्रयत्न आहे. गाड्यांच्या स्वच्छतेवरही भर देण्यात येणार आहे. रेल्वेचा प्रवास अधिक आरामदायक आणि आनंददायी करण्याच्या दृष्टीन रेल्वे प्रशासन प्रयत्नात असल्याचे संबंधित अधिकार्याने सांगितले.