रशियातील सेंट पिटसबर्ग येथे अॅपलचा संस्थापक स्टीव्ह जॉब्ज याचे स्मारक लवकरच उभारले जाणार आहे. या स्मारकाची कल्पना सुचवावी यासाठी एक स्पर्धाच येथे जाहीर करण्यात आली होती. त्याला प्रचंड प्रतिसाद मिळाला. आता या स्पर्धकातून निवडल्या गेलेल्या २५ जणांच्या स्मारकाच्या प्रतिकृतींचे एक प्रदर्शन शहरात आयोजित करण्यात आले असून ते ६ सप्टेंबरपर्यंत सुरू राहणार आहे. या प्रदर्शनातील प्रतिकृतींमधून कोणती निवडायची याचा निर्णय सेंट पिटसबर्ग येथील माहिती तंत्रज्ञान तज्ञ ज्युरी घेणार आहेत तसेच त्यासाठी ऑनलाईन व्होटींगही करता येणार आहे असे प्रोजेक्ट ऑरगनायझरकडून सांगण्यात आले आहे.

अॅपलच्या या संस्थापकाचा ५ आक्टोबर २०११ ला मृत्यू झाला. त्यानंतर हंगेरीतील बुडापेस्ट येथे जॉब्जचा ब्राँझचा पुतळा त्याच्या स्मृतीप्रित्यर्थ उभा करण्यात आला आहे. तसेच ब्राझिलमधील जुंदाई या अगदी छोट्या गावातही त्याचे नांव एका रस्त्याला देण्यात आले आहे. युक्रेन सिटी ओडेशा येथेही जॉब्जचे स्मारक उभारण्यात येणार असल्याची घोषणा करण्यात आली असून तेथे दोन मीटर हाताच्या आकाराचे पोलादी स्मारक उभारण्यात येत आहे. या हाताच्या मधोमध अॅपलचा लोगो असणार आहे. दोनशे किलो वजनाचे हे स्मारक स्टुडंट हॉस्टेलच्या जवळ उभे राहात असून सायंकाळी ते प्रकाशित करण्यात येणार असल्याचेही समजते.