नासाने पाठविलेले १ टन वजनाचे महाप्रंचड क्युरिऑसिटी हे अंतराळयान मंगळावर सुखरूप उतरले असल्याचे यूएस स्पेस एजन्सीकडून जाहीर करण्यात आले आहे. सोमवारी सकाळी ११ च्या सुमारास नासाच्या मंगळाच्या कक्षेत फिरत असलेल्या ओडिसी या उपग्रहाकडून रोव्हर मंगळाच्या विषुववृत्तीय भागात मोठ्या विवरात सुरक्षितपणे उतरल्याचा संदेश आला आणि गेली १० वर्षे यासाठी झटून प्रयत्न करत असलेल्या शास्त्रत्र, संशोधकांनी नासाच्या कंट्रोल रूममध्ये एकच जल्लोश केला. मंगळावर जीवसृष्टीचे कांही पुरावे मिळतात का याचा शोध हे यान घेणार आहे. नासाने मंगळावर पाठविलेले हे चौथे यान असून या उपक्रमाची सुरवात १९९७ साली केली गेली होती.
मंगळावर उतरण्यासाठी क्युरिओसिटी असे नामकरण करण्यात आलेल्या या यानाने ५७० दशलक्ष किमीचा प्रवास केला असून मंगळावर उतरण्यापूर्वीच्या काळाचे हा सात मिनिटांचा थरार असे वर्णन केले गेले आहे. कारण या वेळात या यानाचा २० हजार किमीचा वेग १ किमीवर आणण्यात आला. परिणामी चाके टेकण्यापूर्वी वेग कमी केल्याने यान सुखरूप मंगळाच्या भूमीवर उतरू शकले. आता यानाच्या तब्येतीवर शास्त्रज्ञांनी सर्व लक्ष केंद्रीत केले असून सुरवातीला कांही ब्लॅक अॅन्ड व्हाईट छायाचित्रेही घेण्यात आली आहेत. मात्र दोन दिवसांत रंगीत छायाचित्रे मिळण्यास सुरवात होईल असे सांगण्यात येत आहे.