आमीरखानचा मुलगा जुनेद हा बॉलिवूडमध्ये पदार्पण करत असल्याचे खात्रीलायक वृत्त आहे. आमीरची पहिली पत्नी रीना दत्त हिच्यापासून झालेला जुनेद आत्ता फक्त सतरा वर्षांचा आहे. मात्र तो अभिनेता म्हणून बॉलिवूडमध्ये येत नसून आत्ता तो राजकुमार हिरानीचा सहाय्यक म्हणूनच काम करणार आहे असे समजते. जुनेदला पहिल्यापासूनच चित्रपट दिग्दर्शनात रूची आहे. मात्र हे काम मिळविण्यासाठीही त्याला आमीरला पटवावे लागले आहे तसेच अभ्यासाकडे दुर्लक्ष करणार नाही असेही वचन द्यावे लागले आहे.
हिरानी यांच्या पीके या नव्या चित्रपटातूनच जुनेद सहाय्यक म्हणून काम करत असून या चित्रपटात आमीरखान आणि अनुष्का शर्मा यांची जोडी चमकणार आहे. जुनेदला ही संधी मिळाल्याने त्याने पाहिलेले दिग्दर्शक बनण्याचे स्वप्न पूर्ण होण्याचे चान्सेस आहेत. लहान वयातच ही संधी मिळाल्याने जुनेद आनंदला आहे. जुनेदची कामगिरी पाहिल्यानंतर बॉलिवूडला आणखी एक परफेक्शनिस्ट मिळणार काय या प्रश्नाचे उत्तरही मिळू शकणार आहे. अर्थात त्यासाठी पीके प्रदर्शित होण्याची प्रतीक्षा करणे भाग आहे.
