अफगाणिस्तानच्या उत्तर भागातील उझबेक खासदार अहमदखान समंगण त्यांच्या मुलीच्या लग्नातच करण्यात आलेल्या आत्मघातकी बॉम्बस्फोटात ठार झाले असल्याचे वृत्त आहे. समंगण यांच्यासह अन्य वीस जणही या स्फोटात मृत्युमुखी पडले असून ४० जण जखमी झाले आहेत. समंगण यांच्या कन्येच्या विवाहनिमित्त सुरू असलेल्या पाटीतच पाहुणा म्हणून आलेल्या व्यक्तीने अंगावर लपवून आणलेल्या स्फोटकांचा स्फोट केला. त्यापूर्वी त्याने समंगण यांना आलिंगनही दिले असे प्रत्यक्षदर्शींनी सांगितले आहे.
समंगण गेल्या वर्षीच खासदार बनले होते. अफगाणिस्तानातील १९८० च्या सिव्हील वॉरमध्ये ते मुजाहिद्दीन मिलीशिया कमांडर होते. हमीद करझाईंचे ते कट्टे समर्थक मानले जात. तर जनरल अब्दुल रशीद दुस्तम यांचे ते विरोधक होते. त्यांच्या कन्येच्या विवाहानिमित्त योजण्यात आलेल्या भोजन समारंभाला सुमारे १०० पाहुणे उपस्थित होते.हा आत्मघातकी स्फोट झाला तेव्हा एकच धावपळ उडाली. वरीष्ठ अफगाणी आर्मी कमांडर व गुप्तवार्ता प्रमुखांचाही या स्फोटात मृत्यू झाल्याचे पोलिसांकडून सांगण्यात आले आहे.
तालिबानी संघटनेने या हल्ल्यात त्यांचा कांहीही हात नसल्याचे स्पष्ट केले आहे.
