एखादा माणूस नव्या व्यक्तीला भेटतो तेव्हा त्या दोघांचे व्यक्तिमत्व, कपडे, भाषा आणि देहबोली यावरून एकमेकांविषयी काही ठराविक मत तयार होत असते आणि पहिल्या भेटीत होणारे हे मत बहुतेक बरीच वर्षे कायम रहात असते. काही मानसशास्त्रज्ञ तर या पहिल्या भेटीला महत्व देतातच, परंतु अधिक खोलात जाऊन असेही सांगतात की, माणसाचे पहिले इंप्रेशन त्याला लोकांनी पाहिल्यानंतरच्या पहिल्या सहा सेकंदातच तयार होत असते. त्यामुळे प्रथमदर्शनी पडणारा प्रभाव हा विषय परस्पर संबंध आणि व्यापार, उद्योग यामध्ये सर्वाधिक महत्वाचा विषय झाला आहे आणि त्यातून निर्माण झाले आहे एक नवे शास्त्र अर्थात शास्त्रातूनच त्याला व्यवसायाचेही रूप आले आहे आणि व्यवसायाचे रूप आल्यामुळे करिअर संधी आणि प्रशिक्षण या दोन्ही आघाड्यांवर या व्यवसायामध्ये खूप काही घडायला लागले आहे.
इमेज मॅनेजमेंट असे या व्यवसायाचे नाव आहे. त्यामध्ये तीन गोष्टींना महत्व आहे. ए, बी आणि सी. ए म्हणजे ऍपियरन्स, बी म्हणजे बिहेवियर आणि सी म्हणजे कम्युनिकेशन. या तीन गोष्टींना धरून लोकांना काही शिक्षण दिले तर लोकांमध्ये आपली इमेज निर्माण करण्याची जागरूकता आणि जाणीव निर्माण होते. या इमेजला आता सर्वत्र महत्व आलेले आहे. निरनिराळ्या कंपन्यांमध्ये विविध कामांसाठी येणार्‍या ग्राहकांना पहिल्यांदा स्वागतिकेचे दर्शन घडते. तिची पर्सनॅलिटी, स्वागत करण्याची पद्धत आणि विचारलेली माहिती देतानाची भाषा, आविर्भाव या सगळ्यावरून आलेल्या व्यक्तीचे कंपनीविषयीचे मत तयार होत असते. म्हणून ज्या ज्या कंपन्यांमध्ये स्वागतिका बसलेल्या असतात त्या सर्व कंपन्यांची इमेज मॅनेजमेंट प्रशिक्षण ही गरज झाली आहे. या गरजेचा विचार केला असता इमेज मॅनेजमेंट हे किती मोठे क्षेत्र आहे याचा अंदाज येऊ शकतो आणि हा आवाका विचारात घेऊन आता मोठ्या शहरांमध्ये इमेज मॅनेजमेंट सल्लागार उदयाला येत आहेत. हे सल्लागार लोकांना आपल्या व्यक्तिमत्वाच्या अनुषंगाने काही सूचना आणि प्रशिक्षण देत असतात. हा एक चांगला पैसा देणारा व्यवसाय झाला आहे. त्यामुळे आगळ्या वेगळ्या क्षेत्रात करिअर करण्याची आवड असणार्‍या तरुण-तरुणींनी या क्षेत्रात पदार्पण करून स्वत:चा व्यवसाय सुद्धा निर्माण करण्यास काही हरकत नाही.
इमेज मॅनेजमेंट अभ्यासक्रमाचे प्रशिक्षण देणार्‍या काही संस्था अशा आहेत. झेवियर इन्स्टिट्यूट ऑफ कम्युनिकेशन मुंबई, www.xaviercomm.org सिम्बॉयसीस इन्स्टिट्यूट ऑफ मिडिया ऍन्ड कम्युनिकेशन पुणे www.sim.edu सध्या मुंबई आणि दिल्लीमध्ये एम.बी.ए.चा अभ्यासक्रम पूर्ण करून अनेक तरुण-तरुणी इमेज मॅनेजमेंटच्या क्षेत्रात पदार्पण करत आहेत. शिवाय काही उद्योजकांनी आणि नामवंत संस्थांनी या विषयाला असलेले महत्व ध्यानात घेऊन स्वत:चे मोठे व्यवसाय सुरू केलेले आहेत. तिथे इमेज मॅनेजमेंटचे शिक्षण घेतलेल्या विद्यार्थ्यांना नोकरीची चांगली संधी आहे. शिवाय इमेज मॅनेजमेंटचे शिक्षण देणार्‍या संस्थांना शिक्षकांची कमतरता भासत आहे. तेव्हा शिक्षक म्हणूनही उत्तम संधी मिळू शकते.