नवी दिल्ली दि.९- टिव्हीएस मोटर्स बीएमडब्ल्यू या प्रसिद्ध वाहनकंपनीच्या मोटरसायकल विभागाशी तंत्रज्ञान सहकार्य करार करण्याच्या प्रयत्नात असल्याचे टिव्हीएस मोटर्सचे अध्यक्ष वेणू श्रीनिवासन यांनी सोमवारी जाहीर केले.
याविषयी अधिक माहिती देताना श्रीनिवासन म्हणाले की बीएमडब्ल्यूच्या मोटरसायकल विभागाबरोबर तंत्रज्ञान सहकार्य कराराची बोलणी आम्ही करत असून त्यामुळे आधिक पॉवरफुल मोटरसायकल बनविण्यास आम्हाला मदत होणार आहे.
सध्या टिव्हीएसला भारतीय बाजारात हिरो मोटोकॉर्प तसेच बजाज ऑटो या बड्या आणि स्थिरावलेल्या कंपन्यांशी स्पर्धा करावी लागते आहे. बीएमडब्ल्यू बरोबर तंत्रज्ञान करार झाला तर ही स्पर्धा अधिक सोपी होणार असल्याचेही श्रीनिवासन यांनी सांगितले. बीएमडब्ल्यू मोटोरॅड यांच्या आर व के सिरीजमधल्या एस १००० आर आर या सुपरबाईक मॉडेल्सची विक्री सध्या भारतात केली जात आहे असे समजते.