सलमान खानचा राग काय असतो तो सगळ्या बॉलीवूडला माहित आहे. त्याचा फटका आतापर्यंत बऱ्याच जणांना बसला आहे. त्याच्याशी पंगा घेतलेल्या काही लोकांशी तो अजूनही बोलत नाही. मात्र गेल्या काही दिवसापासून सलमानमध्ये बराच बदल झलेला दिसत आहे. त्याने आता बॉलीवूडमधील सर्वांशी जुळवून घ्यायचे ठरवलेले दिसत आहे. काही दिवसापूर्वीच त्याने अभिषेकशी दोस्ती केली. तर आता रणबीर कपूर सोबत असलेली दुश्मनी त्याने संपवली आहे.
महबूब स्टुडिओमध्ये सलमान खान शूटिंग करीत असताना त्याच ठिकाणी रणबीरचे शूटिंग सुरू असल्याचे त्याला कळले. त्याने लगेचच सहकाऱ्याला रणबीरला बोलवयाला पाठविले. पहिल्यांदा रणबीरचा सलमानने आपल्याला बोलावले आहे यावर विश्वासच बसेना! मात्र त्यानंतर रणबीरने जाऊन बघितले तर सलमान त्याठिकाणी उपस्थित होता. भेटी नंतर दोघेही सुरुवातीला काही काळ तणावात असल्यासारखे जाणवत होते. मात्र काही वेळानंतर दोघांनीही एकमेकाची आस्थेवाईकपणे चौकशी केली. दोघेही तासभर गप्पा मारत बसले असल्याचे प्रत्यक्षदर्शिनी सांगितले. त्यानंतर दोघे शूटिंगसाठी निघून गेले.
कॅटरीनाने सलमान सोबतचे संबंध तोडून रणबीर सोबत डेटिंग करण्यास सुरुवात केल्याने सलमान व रणबीर यांच्यातील संबध काहीसे ताणले गेले होते. गेल्या काही दिवसापासून कॅटरीना व सलमान यांच्यातील संबध पुन्हा पूर्ववत झाले आहेत. त्यामुळेच सलमानने रणबीरला माफ केले असावे अशी चर्चा आहे. आता सलमान खान विवेक ओबेरॉय व अमीर खान सोबत कधी जुळवून घेतो याकडे लक्ष लागून राहिले आहे
