नवी दिल्ली – व्हायरसचा धोका संगणक, मोबाइल पाठोपाठ थेट प्रिंटरपर्यंत पोहोचला आहे. सुरुवातीला संगणकापुरता मर्यादित असलेला हा व्हायरसचा धोका कालांतराने वेबसाइट आणि लिंक्सच्या माध्यमातून सर्व्हरर्सपर्यंत पोहोचला. हळुहळू या व्हायरसचे प्रमाण वाढू लागले. साध्या मोबाइल फोन पासून ते स्मार्टपर्यंतच्या सर्व मोबाइल्समध्ये व्हायरसचा शिरकाव होऊ लागला. यापूर्वी इनपूट डिवाइस पुरता मर्यादित असलेला व्हायरस आता आऊटपूट डिवाइसमध्येही शिरकाव करू लागला आहे. याचे उदाहरण म्हणजे आता व्हायरस थेट प्रिंटरमध्ये येऊन ठेपला आहे. भविष्यात हा व्हायरस की-बोर्ड किंवा माऊसमध्ये आला तर आश्चर्य वाटायला नको.
मिलिसेन्सो असे या व्हायरसचे नाव असून अमेरिका, युरोपसह भारतातील हजारो प्रिंटरला या व्हायरसचा दणका बसला आहे. सर्वात पहिल्यांदा २०१० मध्ये हा व्हायरस आढळून आल्याचे सिमॅन्टकच्या ब्लॉगवर नमूद करण्यात आले आहे. त्यानंतर वारंवार या व्हायरसचे प्रताप दिसू लागले. नुकतेच एका फ्रेंच भाषेतील ऍडवेअरच्या वितरणात हा व्हायरस आढळून आला आहे. ई-मेल ऍटॅचमेंट, वेबसाइटस किंवा बनावट व्हिडीओ डिकोडरच्या माध्यमातून हा व्हायरस कम्प्युटरपर्यंत पोहोचतो. त्यानंतर हा व्हायरस इंटरनेटवरील सर्व ट्रॅफीक जाहिरातींकडे वळवतो. त्याचबरोबर हा व्हायरस प्रिंट देण्यासाठी फाइल्स तयार करतो. त्यामुळे प्रिंटरवर आपल्या अनोळखी भाषेतील प्रिंटआऊट येऊ लागतात आणि हजारो कागद वाया जातात. या व्हायरसचा दणका बसलेल्या अनेक संस्थांनी विविध डिस्कशन फोरमवर याची माहिती जाहीर केली आहे. त्यावर आता ऍण्टी व्हायरस कंपन्यांनी अपडेटस जाहीर केले असून या माध्यमातून या व्हायरसवर मात करण्याचे प्रयत्न सुरू आहेत. भविष्यात एखाद्या कंपनीचे मोठे नुकसान करण्यासाठी या प्रकारच्या व्हायरसचा मोठ्याप्रमाणावर वापर होऊ शकतो.
मॅकफी या कंपनीने या व्हायरवर विशेष संशोधन केले असून,यामध्ये हार्ड डिस्कचा सिरिल नंबर, सिस्टिम ३२ क्रिएशन टाइम, सिस्टिम व्हाल्युम इन्फरमेशन या माहितीचा वापर करून हा व्हायरस काम करत असल्याचे उघड झाले आहे. हा व्हायरस थेट डीएलएल फाइल्समध्ये बिघाड करतो. सध्या याच्यावर कोणताही उपाय नसून कम्प्युटर रिबुट करण्याशिवाय पर्याय नसल्याचे कंपनीचे म्हणणे आहे.
