व्हेंडिग मशीनमधून चहा,कॉफी,चॉकलेटे मिळणे ही अपूर्वाई राहिलेली नाही. पुण्यात तर मधमाशी पालन केंद्रात व्हेंडिग मशीनमधून मधही मिळत असे. अमेरिकेतील एका बेकरी समुहाने कप केक सर्व्ह करणारे व्हेंडिग मशीन सुरू कले असून हे जगातील पहिलेवहिले केक व्हेंडिग मशीन आहे. त्यामुळे आता रात्री अपरात्री भुकेने कासावीस झाला असाल तर या मशीनमधून ताजे ताजे, तुमच्या पसंतीचे केक तुम्हाला उपलब्ध होऊ शकणार आहेत.
या बेकरी समुहाने हे पहिले मशीन बेव्हर्ली हिल्स भागातील स्प्रिंकलर्स फ्लॅगशीप स्टोअरसमोरच बसविले आहे. या स्टोअरचे प्रवक्ते व्हॅनिट चॅप्लॉट या विषयी अधिक माहिती देताना सांगतात की एटीएम प्रमाणेच दिसणार्‍या या मशीनचे आगळेपण तुम्ही जवळ आलात की कळेल. टच स्क्रीन ला तुम्ही स्पर्श केलात की मशीनमध्ये असलेल्या केकच्या व्हरायटीची माहिती तुम्हाला दिसेल. त्यातून तुम्हाला हवा त्या फ्लेवरचा केक पसंत करून तुम्ही किलक करायचे आणि क्रेडीट कार्ड स्वॅप करायचे. कार्ड प्रोसिजर पूर्ण झाली की एक रोबो हात तुम्हाला तुमच्या मागणीप्रमाणे केक आणताना व्हिडीओवर दिसेल व कांही क्षणातच तुमचा कप केक प्लॅटफॉर्मवर ठेवला जाईल. आकर्षक बॉक्समध्ये तो पॅक होईल आणि तुमच्या हातात सोपविला जाईल.
या मशीनमधून सुरवातीला व्हॅनिला, चॉकलेट, वेलवेट, दालचिनी अशा कांही फ्लेवर्सचे केक मिळणार आहेत. अमेरिकेत अशी आणखी नऊ मशीन्स बसविण्यात येणार असून नंतर जगभरात अशी मशीन्स बसवायची या उद्योगसमुहाची कल्पना आहे.
