नवी दिल्ली, दि.१५ -संयुक्त पुरोगामी आघाडी अर्थात युपीएने केंद्रीय अर्थमंत्री प्रणव मुखर्जी यांना शुक्रवारी राष्ट्रपतीपदासाठी उमेदवारी जाहीर केली. काँग्रेस अध्यक्ष सोनिया गांधी यांनी मुखर्जी यांच्या नावाची घोषणा केली. मुखर्जी यांच्या नावाची घोषणा झाल्यानंतर समाजवादी पक्षानेही मुखर्जी यांच्या नावाला पाठिंबा दिला असल्याचे जाहीर केले. दरम्यान, एपीजे अब्दुल कलाम हेच आपले राष्ट्रपतीपदासाठीचे उमेदवार असतील अशी ताठर भूमिका तृणमूल काँग्रेसच्या अध्यक्ष आणि पश्चिम बंगालच्या मुख्यमंत्री ममता बॅनर्जी यांनी जाहीर केली. राष्ट्रपतीपदाच्या निवडणुकांच्या पार्श्वभूमीवर राष्ट्रीय लोकशाही आघाडीने आपली भूमिका अद्याप गुलदस्त्यातच ठेवली आहे. राष्ट्रपतीपदासाठी आता प्रणव मुखर्जी आणि एपीजे अब्दुल कलाम यांच्यात लढत होण्याची शक्यता तूर्तास तरी दिसत आहे.
राष्ट्रपतीपदाच्या उमेदवार निवडीच्या निश्चेतेबाबत शुक्रवारी सकाळी नवी दिल्ली येथील पंतप्रधानांच्या निवासस्थानी घेण्यात आलेल्या बैठकीत पी. चिदंबरम, सलमान खुर्शीद आणि प्रणव मुखर्जी सहभागी झाले होते. या बैठकीत ७७ वर्षांचे, काँग्रेसचे ज्येष्ठ नेते असलेले प्रणव मुखर्जी यांच्या नावावर यूपीएच्या प्रमुख आणि काँग्रेस अध्यक्ष सोनिया गांधी यांनी शिक्कामोर्तब केले. तशी घोषणाही त्यांनी केली. या घोषणेमुळे यूपीएकडून राष्ट्रपतीपदासाठी उमेदवार कोण , या चर्चेला आता पूर्णविराम मिळाला आहे. तर सर्व राजकीय पक्षांनी माजी राष्ट्रपती ए.पी.जे अब्दुल कलाम यांनाच पाठींबा द्यावा असे आवाहन ममतांनी केले आहे.
दरम्यान, समाजवादी पक्षाच्या अध्यक्ष मायावती यांनी प्रणव मुखर्जी यांच्या नावाला पाठिंबा दिला आहे. काँग्रेसबरोबर आपले वैचारिक मतभेद आहेत मात्र राष्ट्रपतीपदासाठी मुखर्जी यांना आपल्या पक्षाचा पाठिंबा असल्याचे त्यांनी घेतलेल्या पत्रकार परिषदेत जाहीर केले आहे.
प्रणव मुखर्जी येत्या २४ जून रोजी अर्थमंत्रीपदाचा राजीनामा देऊन दुसऱ्या दिवशी म्हणजे २५ जून रोजी राष्ट्रपतीपदासाठी उमेदवारी अर्ज भरणार असल्याचे चित्र स्पष्ट झाले आहे .