नवी दिल्ली दि.१५- स्वीस बँकेतील भारतीयांचा काळा पैसा परत आणणे आणि त्यासंबंधातील तपशीलाबाबत केंद्राने संसदेत मांडलेल्या श्वेतपत्रिकेबाबत शंका निर्माण होईल अशी परिस्थिती स्वीस राष्ट्रीय बँकेने नुकत्याच जारी केलेल्या अहवालातून निर्माण झाली आहे. केंद्राने श्वेतपत्रिकेत २००६ ते १० या काळात स्वीस बँकांतील भारतीय गुंतवणूक १४ हजार कोटींनी मंदावली असल्याचे जाहीर केले होते. मात्र बँकेच्या अहवालानुसार २०११ सालात भारतीयांची स्वीस बँकांतील गुंतवणूक १२ हजार ७४० कोटींवर गेली असल्याचे नमूद करण्यात आले आहे. गेल्या पाच वर्षात इतकी मोठी गुंतवणूक वाढ प्रथमच झाल्याचेही या अहवालात म्हणण्यात आले असले तरी या गुंतवणुकीत अन्य लोकांच्या नांवे केलेल्या गुंतवणुकीचा समावेश नाही आणि ही अशी त्रयस्थ गुंतवणूक सुमारे २० ते २५ बिलीयन डॉलर्स असावी असा अंदाज व्यक्त केला जात आहे.

या संबंधी मिळालेल्या माहितीनुसार २००६ सालात भारतीयांचा ४० हजार कोटींचा काळा पैसा या बँकांतून ठेवण्यात आला होता. २०१० सालापर्यंत हे प्रमाण १४ हजार कोटींनी घटले हेही खरे. मात्र २०११ सालात पुन्हा त्यात ३५०० कोटींची भर पडली आहे. सरकारने परदेशी बँकांतून गुंतवला गेलेला काळा पैसा परत आणण्याचे प्रयत्न सुरू असल्याचे सांगितले असले तरी या क्षेत्रातील तज्ञांच्या मते मधल्या काळात स्वीस बँकातील पैसा घटण्याचे मुख्य कारण हा पैसा अन्यत्र हलविला गेला हे आहे. स्वीस बकांनी त्यांच्याकडे परकीय नागरिकांनी गुंतविलेल्या पैशांबाबत संबंधित सरकारांनी माहिती मागविल्यास ती दिली गेली पाहिजे यासाठी जागतिक दबाब आणला जात आहे. याचा परिणाम म्हणून अनेकांनी या बँकांतील पैसा अन्यत्र वळविला असल्याचे सांगण्यात येत आहे. सर्वात धक्कादायक बाब अशी की हाच पैसा स्टॉक मार्केट अथवा एफडीआयच्या माध्यमातून पुन्हा भारतात येईल अशी भीती तज्ञ व्यक्त करत आहेत. रिझर्व्ह बँक आणि सेबी या महत्त्वाच्या दोन संस्था असले व्यवहार होतात की काय यावर बारीक लक्ष ठेवून असल्याचे समजते.