मुंबई – महाराष्ट्र नवनिर्माण सेनेचे अध्यक्ष राज ठाकरे यांनी टोलधाडीविरोधात आंदोलन करण्याचे सुतोवाच करताच राज्यातील अनेक टोल नाक्यांवर पक्षाच्या कार्यकर्त्यांनी आंदोलन सुरु केले आहे. आज मनसे कार्यकर्त्यांनी बुलढाणा जिल्ह्यातील सिंदखेडराजा येथील टोलनाका फोडला. तसेच मुंबई-अहमदाबाद महामार्गावरही आंदोलन करुन वसईच्या टोलनाक्यावर तोडफोड केली. त्यानंतर दुपारी वाशीच्या टोल नाक्यावरही आंदोलन केले. याशिवाय नाशिक-निफाड महामार्गावरही आंदोलन सुरु करण्यात आले. ओंढा येथील टोलनाका मनसेच्या कार्यकर्त्यांनी फोडला. सुमारे १०० कार्यकर्त्यांनी पोलिसांनी अटक केली. तर दुपारी औरंगाबादजवळ हरसुल येथील टोल नाक्यावरही सुमारे ५० ते ६० कार्यकर्त्यांनी आंदोलन करुन टोल वसूली थांबविली. नाक्याची तोडफोडही केली.

राज ठाकरे यांनी टोल नाक्यांविरोधात राज्यभर आंदोलन सुरु करण्यात येणार असल्याचा इशारा काल ठाण्यात दिला होता. त्यानंतर काही तासांमध्येच मनसेचे आमदार प्रविण दरेकर आणि त्यांच्या कार्यकर्त्यांनी दहिसर टोल नाक्यावर धडक दिली. टोलधाडीविरोधात मनसेचे आंदोलन आजही सुरुच असून वसईचा खानिवडे येथील टोलनाका सकाळी फोडण्यात आला. वाहतूकही अडवून ठेवली. याठिकाणी १५ ते २० कार्यकर्त्यांना पोलिसांनी ताब्यात घेतले. तर सिंदखेडराजा तालुक्यातील दुसरबीड येथील टोलनाकाही कार्यकर्त्यांनी फोडला.

सिंदखेडराजाजवळचाही टोल नाका कार्यकर्त्यांनी फोडला. या आंदोलनामुळे राज्यभरातील टोल नाक्यांवर सुरक्षा वाढविण्यात आली आहे. नवी मुंबईतील वाशी तसेच मुंबई-पुणे द्रुतगती महामार्गावरील टोलनाक्यांवर बंदोबस्त वाढविण्यात आला आहे.