नवी दिल्ली दि.८- पेट्रोलचे दर आता आकाशाला भिडले आहेत आणि भविष्यात ते खाली येण्याची कोणतीही चिन्हे नाहीत. सर्वसामान्य माणसाला आता कार घ्यायची असेल तर प्रथम पेट्रोलदराचाच विचार करावा लागणार .मात्र टाटा मोटर्सने सर्वसामान्यांना दिलासा मिळेल आणि त्यांची कारची हौसही भागविली जाईल अशी कार तयार केली आहे. एक लाख रूपयांत नॅनोचे स्वप्न पूर्ण केल्यानंतर आता ही नवी टाटा मेगापिक्सल कारही सर्वसामान्यांचे गाडीचे स्वप्न पूर्ण करेल असा विश्वासही कंपनीने व्यक्त केला आहे.
मार्च महिन्यातच ८२ व्या जेनिव्हा मोटर शो मध्ये ही कार प्रदर्शित करण्यात आली होती. सामानासह चार मोठी माणसे आरामात बसू शकतील अशी ही कार रीव्ह या संकल्पनेवर आधारित आहे.( रिव्ह म्हणजे रेंज एक्स्टेंक्शन इलेक्ट्रिक व्हेईकल) या गाडीच्या चार चाकांवर चार स्वतंत्र इलेक्ट्रिक मोटर बसविण्यात आल्या आहेत. गाडी सुरू असतानाही ती रिचार्ज करण्याची सोय आहे. ऑन बोर्ड पेट्रोल जनरेटरमुळे हे शक्य आहे. १ लिटर पेट्रोल मध्ये ही गाडी जाईल १०० किलोमीटर. विश्वास बसत नाही ना ! एकच इंधन टाकी असूनही त्यामुळे ही गाडी ९०० किमीपर्यंतचा प्रवास सहजी करू शकणार आहे. चार्जिंग सुरू करण्यासाठी ती इंडक्शन पॅडवर पार्क करायची.फुल चार्ज झाली की निघा कुठे जायचे तिकडे. या कारला डबल स्लायडिंग डोअर्स असून त्यामुळे गाडीत बसणे आणि उतरणे अगदी सुलभरितीने करता येते असाही कंपनीचा दावा आहे.
